मकवानपुरमा एक उपमहानगरपालिकासहित १० स्थानीय तह प्रस्ताव

173
Want create site? Find Free WordPress Themes and plugins.

कात्तिक,२४

मकवानपुर जिल्लाको स्थानीय तह पुनर्संरचना प्राविधिक सहयोग समितिले १० स्थानीय तह गठनको प्रस्ताव गरेको छ । एक उपमहानगरपालिका, एक नगरपालिका र ८ गाउँपालिका गठनको प्रस्तावसहितको प्रतिवेदन स्थानीय तहको संख्या र सीमाना निर्धारण आयोगलाई बुझाइएको हो ।

जिल्ला विकास समिति मकवानपुरको नेतृत्वमा गठन भएको प्राविधिक समितिले बुझाएको प्रतिवेदनमा हेटौंडा उपमहानगरपालिका र थाहा नगरपालिका गठनको प्रस्ताव गरिएको छ । यसैगरी बकैया, कैलाश, बाग्मती, भीमफेदी, मनहरी, राक्सिराङ, इन्द्रसरोवर र मकवानपुरगढी गाउँपालिका गठनको प्रस्ताव गरिएको छ ।

हेटौंडा उपमहानगरपालिका

प्राविधिक समितिले तयार पारेको प्रतिवेदनमा साविकको हेटौंडा उपमहानगरपालिकालाई कायम राख्ने प्रस्ताव गरेको छ । यसअघि यस उपमहानगरपालिकामा मकवानपुरगढी गाविसलाई समेत गाभ्ने प्रस्ताव थियो । तर अहिले गाविसलाई उपमहानगरपालिकासँग छुट्याइएको छ । प्रतिवेदनमा उपहानगरपालिकाको आर्थिक अवस्था मजवुद रहेको र त्यहाँ अहिले नै ७ वटा ठूला उद्योग रहेको बताइएको छ । यस्तै घरेलु, साना र मझौला गरी ३ हजार ७ सय ९० उद्योगहरु छन् । ६ वटा तारे होटल छन् भने साना होटल तथा लजको संख्या असंख्य रहेको प्रतिवेदनमा उल्लेख छ ।

थाहा नगरपालिका

साविकको थाहा नगरपालिकामा थप तीन गाविस गाभिनेछन् । प्रतिवेदनमा आग्रा, टिष्टुङ र चित्लाङ गाविस गाभ्ने प्रस्ताव गरिएको छ । ४० हजार रहेको थाहा नगरपालिकाको केन्द्र दामन इन्द्रायणी चौरलाई प्रस्ताव गरिएको छ ।

नगरपालिकाका लागि सबै भूभागमा पर्यटकीय क्षेत्र रहेको र त्यसको विकास गर्न सकिने लेखिएको छ । प्रस्तावित यस नगरपालिकामा अहिले ५२ वटा पीच भएका सडक छन् भने ग्राभेल भएका ९९ वटा सडक छन् । यस्तै १ सय ५८ वटा कच्ची सडक छन् । त्यसमध्ये अहिलेको आग्रा गाविस विकासका दृष्टिकोणले पछाडि परेको तथ्यांकले देखाएको छ । प्रस्तावित थाहा नगरपालिका सिंचाइमा पछाडि छ । प्रस्तावित यस नगरपालिका सिंचाइ सुविधाविहीन नगरपालिका हुनेछ ।

तर, विद्युतीकरणमा भने अगाडि देखिएको छ । नगरपालिकाभित्र पर्ने अहिलेका गाविसहरुमा समेत कम्तिमा ८० प्रतिशत विद्युतिकरण भइसकेको प्रतिवेदनमा उल्लेख छ । यस्तै यस नगरपालिकामा २ सय ५५ वटा साना उद्योग छन् । तर एउटा पनि ठूला उद्योग छैन । एउटा पनि होटल छैन । तर यो पर्यटकीय दृष्टिकोणले सम्भावना बोकेको क्षेत्र हो । दामन, पालुङ, चित्लाङ सहितको क्षेत्र पर्यटकीय तथा व्यावसायीक खेतीका लागि उर्वर भूमि रहेको प्रतिवेदनमा उल्लेख छ ।

बकैया गाउँपालिका

प्रस्तावित यस गाउँपालिकामा पाँचवटा गाविस गाभिनेछन् । ठिंगन, मन्थली, छतिवन, शिखरपुर र धियाल गाविसलाई मिलाएर बकैया गाउँपालिका बनाउन प्रस्ताव गरिएको छ । यस गाउँपालिकाको केन्द्र हात्तिसुँडेलाई प्रस्ताव गरिएको छ । प्रतिवेदनमा बकैया गाउँपालिकाको आम्दानीको स्रोतमा कृषि र पर्यटकीय क्षेत्रलाई देखाइएको छ । तर कुनै पनि आम्दानीको स्रोत व्यवस्थित नभएको प्रतिवेदनमा उल्लेख छ ।

यस गाउँपालिका अन्तर्गतका भूभागमा अहिलेसम्म एउटा पनि फोहोर प्रशोधन वा संकलन केन्द्र छैन । पर्यटकका लागि एउटा पनि पार्क छैन । यातायात सेवा अन्तर्गत बसपार्कको निर्माण भएको छैन भने एउटा पनि पिच भएको सडक छैन । यस्तै जम्मा ३२ किलोमिटर सडक मात्र ग्राभेल भएका छन् । कच्ची सडकको लम्बाइ भने ८८ किलोमिटर छ ।

प्रस्तावित बकैया गाउँपालिका स्वीकृत भए २५ हजार ९ सय ५३ वर्गमिटर क्षेत्रफलमा फैलिएको वन क्षेत्र रहने छ । धेरैजसो कृषियोग्य समथर भूमि र केही पहाडी भूमि रहेको यस क्षेत्र जैविक विविधताले सम्पन्न रहेको र आम्दानीको मुख्य स्रोत कृषि हुने प्रतिवेदनमा उल्लेख छ ।

कैलाश गाउँपालिका

प्राविधिक समितिले साविकका गाविसहरु कालिकाटार, भार्ता, गोगने, डाँडाखर्क र नामटार गाविसलाई गाभेर कैलाश गाउँपालिका बनाउन प्रस्ताव गरेको छ । यसअघिको प्रतिवेदनमा यसको नाम बैकुण्ठ वा मेन्दोलिङ गाउँपालिका प्रस्ताव गरिएको थियो । अति विपन्न, जनजाति बाहुल्य र भौगोलिक विकटता भएको क्षेत्र भएकाले बिशेष क्षेत्रको रुपमा घोषणा गर्नुपर्ने पनि प्रस्ताव छ ।

यस क्षेत्रमा एउटा पनि वित्तीय संस्था छैन भने ५० प्रतिशत घरमा मात्र विद्युतीकरण भएका छन् । त्यसमध्ये १० प्रतिशतले सोलारबाट विद्युत सेवा पाएका छन् । प्रस्तावित यस गाउँपालिकामा एउटा पनि वसपार्क, सामुदायिक भवन र प्राविधिक विद्यालय नभएको प्रतिवेदनमा उल्लेख छ । प्राविधिक समितिले जनजातिहरुको बाहुल्यता र आर्थिक रुपले विपन्नताको बाहुल्य रहेको प्रस्तावित कैलाश गाउँपालिकालाई बिशेष क्षेत्र सिफारिस गरेको छ ।

बाग्मती गाउँपालिका

प्राविधिक समितिले प्रस्ताव गरेको बाग्मती गाउँपालिकामा साविकका तीन गाविसहरु राईगाउँ, फापरबारी र वेतिनीलाई मिलाउने प्रस्ताव छ । प्रस्तावित गाविसको जनसंख्या ३० हजार छ । त्यस क्षेत्रमा १२ वटा पर्यटकीय क्षेत्र छन् । बसपार्क छैन भने ढल निकासको व्यवस्था छैन । प्रस्तावित गाउँपालिकाका करिब ५० प्रतिशतसँग खानेपानीको सहज पहुँच छ । यहाँका सबै गाउँहरु खुलादिसा मुक्त क्षेत्र घोषणा भएका छन् । तर, एउटा वित्तीय संस्था स्थापना नभएको प्रतिवेदनमा उल्लेख छ ।

फापरबारीमा ८० प्रतिशत घरमा विद्युतीकरण भएका छन् । राइगाउँ गाविसमा अहिलेसम्म सोलारबाट जम्मा १० प्रतिशत घरमा बिजुली बलेको छ । वेतिनी गाविसमा एउटा घरमा पनि विद्युतीकरण हुन सकेको छैन । यस्तै उद्योगधन्दाको विकास हुन सकेको छैन भने होटल व्यवसायको विकास पनि भएको छैन ।

प्राविधिक समितिका अनुसार जिल्लाको पूर्वी भूभागमा पर्ने प्रस्तावित यस गाउँपालिकामा विकासका पूर्वाधारहरु छैनन् । सडक सञ्जालले यो गाउँपालिकालाई छुन सकेको छैन । तर, उच्च भूभाग भएपनि प्राय समथर भूभाग रहेकाले भविष्यमा यस क्षेत्रमा विकासको सम्भावना रहेको प्रतिवेदनमा उल्लेख छ ।

भिमफेदी गाउँपालिका

जिल्ला प्राविधिक समितिले साविकका इपापञ्चकन्या, भिमफेदी, भैंसे, निबुवाटार र कोगटे गाविसलाई मिलाएर भिमफेदी गाउँपालिका गठनको प्रस्ताव गरेको छ । प्रस्तावित यस गाउँपालिका खानेपानीको पहुँचमा छ । तर विकासका अन्य पूर्वाधारको राम्रो विकास हुन नसकेको प्रतिवेदनमा उल्लेख छ । विद्युत उत्पादनका लागि निकै धेरै सम्भावनाहरु रहेको भन्दै जिल्ला प्राविधिक समितिले यसको सदूपयोग हुन सके प्रस्तावित यस गाउँपालिकाको भविष्य निकै सुन्दर रहेको उल्लेख गरेको छ ।

यस क्षेत्रमा वन संरक्षरण निकै राम्रो रहेको तर आर्थिक स्रोतको सदूपयोग हुन नसकेको प्रतिवेदनमा लेखिएको छ ।

मनहरी गाउँपालिका

जिल्ला प्राविधिक समितिले साविकका मनहरी र हाँडिखोला गाविसलाई मिलाएर मनहरी गाउँपालिका गठनको प्रस्ताव गरेको छ । यसअघि यीनै दुई गाविसलाई मिलाएर राप्तीदुन गाउँपालिका राख्ने प्रस्ताव गरिएको थियो । तर त्यसमा नयाँ प्रस्ताव ल्याइएको हो ।

यसको जनसंख्या करिब ३८ हजार ३ सय ९९ छ । हेटौंडा उपमहानगरपालिकासँग सीमाना जोडिएको प्रस्तावित मनहरी गाउँपालिका सडक सञ्चालको पहुँचबाट पनि सम्पन्न छ । ३२ हजार वर्गमिटर क्षेत्रफल वनजंगलले ओगटेको छ । यस क्षेत्रमा २ वटा बैंक स्थापना भइसकेका छन् भने १३ वटा सहकारी संस्था छन् ।

१५ वटा व्यापारिक केन्द्र रहेको यस क्षेत्रमा ८० प्रतिशत विद्युतीकरण भएको छ । प्रायजसो समथर भूभाग रहेको यस गाउँपालिका शहरी विशेषता विकास हुँदै गएकाले भविष्यमा नगरपालिकामा स्तरवृद्धि हुने सम्भावना रहेको प्राविधिक समितिले तयार गरेको प्रतिवेदनमा उल्लेख छ ।

राक्सिराङ गाउँपालिका

साविकका राक्सिराङ, कांकडा, सरिखेत र खैराङ गाविसलाई मिलाएर राक्सिराङ गाउँपालिका बनाउन प्राविधिक समितिले प्रस्ताव गरेको छ । यस गाउँपालिकामा एउटा संरक्षित क्षेत्र घोषणा गर्नुपर्ने प्रस्ताव पनि गरिएको छ । अति विपन्न, सिमान्तकृत चेपाङ र जनजातिको वाहुल्यता भएकाले विशेष संरक्षित क्षेत्र घोषणाको प्रस्ताव गरिएको हो ।

प्रस्तावित यस गाउँपालिकामा पिच सडक निर्माण हुन सकेको छैन भने जम्मा ७ किलोमिटर ग्राभेल सडक बनेको छ । कच्ची सडकको दुरी पनि निकै कम छ । उच्च भूभागमा रहेको गाउँपालिका भएकाले विकासका पूर्वाधार नरहेको प्रतिवेदनमा उल्लेख छ ।

इन्द्रसरोवर गाउँपालिका

मकवानपुर जिल्ला प्राविधिक समितिले साविकका कुलेखानी, मार्खु, सिस्नेरी र फाखेल गाविसहरुलाई गाभेर इन्द्रसरोवर गाउँपालिका गठन गर्ने प्रस्ताव गरेको छ । यसअघि यस गाउँपालिका अन्तरगत ईपापञ्चकन्या र कोगटे गाविसलाई पनि राखिएको थियो । तर अहिले भएको नयाँ प्रस्तावमा उति गाविसलाई हटाइएको छ ।

कुलेखानी बाहेक यस गाउँपालिकामा पक्की सडकको दुरी निकै कम छ । यस्तै ग्राभेल गरिएको सडकको दूरी पनि करिब ५० किलोमिटर मात्र छ । तर करिब ८० प्रतिशत घरमा विद्युतीकरण भएको छ । विकासका पूर्वाधारको राम्रो विकास नभएपनि प्रस्तावित गाउँपालिका पर्यटकीय क्षेत्र तथा तरकारी खेतीको उच्च सम्भावना रहेको प्रतिवेदनमा उल्लेख छ ।

मकवानपुरगढी गाउँपालिका

जिल्ला प्राविधिक समितिले साविकका मकवानपुरगढी, आमभञ्ज्याङ, सुकौरा र बुढीचौर गाविसलाई मिलाएर मकवानपुरगढी गाउँपालिका गठनको प्रस्ताव गरेको छ । यसअघि जिल्ला प्राविधिक समितिले जिल्लामा ९ वटा स्थानीय तह गठनको प्रस्ताव गरेकोमा नयाँ प्रतिवेदनमा एउटा गाउँपालिका थप गरिएको हो । सो अन्तरगत मकवानपुरगढी गाउँपालिका प्रस्ताव भएको छ ।

Did you find apk for android? You can find new Free Android Games and apps.

LEAVE A REPLY

Please enter your comment!
Please enter your name here